Rəqabət mühitinin qorunması, dövlət satınalmalarında əlçatanlığın təmin olunması, keyfiyyət infrastrukturunun beynəlxalq tələblərə uyğunlaşdırılması və istehlakçı hüquqlarının müdafiəsi sahəsində həyata keçirilən tədbirlərin ölkəmizin dayanıqlı iqtisadi inkişafına yönəldiyi qeyd edilib.
İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti 2023-cü il üzrə fəaliyyətinin yekunlarına həsr olunmuş mətbuat konfransı keçirib. Dövlət Xidmətinin rəisi Məmməd Abbasbəyli KİV nümayəndələrinə qurum tərəfindən ötən il rəqabət və dövlət satınalmaları sahəsində qanunvericilik bazasının təkmilləşdirilməsi, keyfiyyət infrastrukturu və istehlakçı hüquqlarının müdafiəsi ilə əlaqədar həyata keçirilən tədbirlər və maarifləndirmə işləri barədə məlumat verib. Ölkədə biznes və investisiya mühitinin davamlı olaraq yaxşılaşdırılması məqsədilə rəqabətin qorunması istiqamətində mühüm addımların atıldığını qeyd edən Xidmət rəisi ötən il “Dövlət satınalmaları haqqında” yeni Qanunun təsdiq olunduğunu, həmçinin Rəqabət Məcəlləsinin Milli Məclisdə üçüncü oxunuşda qəbul edildiyini xüsusi vurğulayıb. Qeyd olunub ki, bu qanunvericlik aktları sağlam rəqabətə əsaslanan bazar iqtisadiyyatının inkişafına, ölkədə sahibkarlıq fəaliyyətinin stimullaşdırılmasına və dayanıqlı iqtisadi artıma əhəmiyyətli töhfə verəcək.
Dövlət Xidməti tərəfindən 2023-cü ildə rəqabət vəziyyətinin təhlil edilməsi məqsədilə kənd təsərrüfatı sektoru, karqo xidmətləri, dərman vasitələri və genişzolaqlı internet xidmətləri üzrə bazar araşdırmalarının aparıldığı və rəqabət təhlillərinin nəticələrinə uyğun olaraq qanunamüvafiq tədbirlərin görüldüyü qeyd edilib. Bildirilib ki, 2023-cü ildə haqsız rəqabətə yol vermə əlamətləri üzrə 48 işə baxılması başa çatıb, qanun pozuntusuna yol vermiş 24 bazar subyektinə 650 min manatadək maliyyə sanksiyası tətbiq edilib. 26 sahibkarlıq subyekti qanun pozuntularını könüllü aradan qaldırıb.
Cari ilin yanvar ayının 1-dən “Dövlət satınalmaları haqqında” yeni Qanunun qüvvəyə minməsi, bununla da, elektron satınalmalara keçidin yekunlaşdırılması istiqamətində atılan əhəmiyyətli addımlar vurğulanıb. Qeyd olunub ki, elektronlaşma nəticəsində sahibkarlar üçün dövlət satınalmaları daha əlçatan olacaq və müvafiq sahədə rəqabəti təşviq edəcək. 2023-cü ildə ümumi satınalmaların məbləğinin 7,5 milyard manatdan çox olduğu açıqlanıb. Hesabat dövründə elektron satınalmaların ümumi satınalmalarda payı 22,4% təşkil edib. 2022-ci illə müqayisədə ötən il elektron satınalmaların həcmi 32,9% artıb.
İştirakçılar, həmçinin “etender.gov.az” portalının funksionallığının artırılması, dövlət qurumları ilə inteqrasiyası ilə bağlı görülən işlər barədə məlumatlandırılıb. Bildirilib ki, ötən il Dövlət Xidməti Mərkəzi Bank ilə birlikdə bank təminatlarının dövlət satınalmalarının vahid internet portalına inteqrasiyasını həyata keçirib. Bundan əlavə, Dövlət Vergi Xidməti tərəfindən sahibkarlara verilən arayış elektronlaşdırılıb.
Media nümayəndələrinə keyfiyyətə nəzarət sahəsində həyata keçirilən tədbirlər barədə məlumat verilib. Ötən il “Milli standartlaşdırma sisteminin beynəlxalq tələblərə uyğunlaşdırılmasına dair 2023–2025-ci illər üçün Dövlət Proqramı”nın qəbul olunduğu qeyd edilib. Bildirilib ki, Dövlət proqramının icrası nəticəsində Azərbaycanda beynəlxalq tələblərə uyğun texniki tənzimləmə sisteminin yaradılması xarici ticarətdə texniki maneələrin aradan qaldırılmasına, ixrac potensialının artırılmasına, istehlak bazarlarının təhlükəli mallardan qorunmasına və sağlam rəqabət mühitinin qurulmasına xidmət edəcək.
2023-cü ildə Azərbaycan Standartlaşdırma İnstitutu (AZSTAND) tərəfindən 139 yeni dövlət standartının qəbul edildiyi vurğulanıb. Bu, ötən il qeydə alınan göstərici ilə müqayisədə iki dəfədən çox artım deməkdir. Hesabat dövründə Azərbaycan Akkreditasiya Mərkəzi (AzAK) uyğunluğu qiymətləndirən 85 qurumu akkreditasiya edib. Azərbaycan Metrologiya İnstitutu ölkəyə idxal olunan mindən çox ölçmə vasitəsinin tipə uyğunluğunu tanıyıb və onlara dair məlumatlar dövlət reyestrinə daxil edilib. Sahibkarlıq subyektlərinə Dövlət Xidməti tərəfindən 72554 mənşə sertifikatı verilib ki, bu da 2022-ci ilin müvafiq dövrü ilə müqayisədə 18,7% çoxdur.
Görüşdə Dövlət Xidməti tərəfindən istehlakçı hüquqlarının müdafiəsi və istehlak bazarına nəzarət sahəsində həyata keçirilən tədbirlər barədə geniş məlumat verilib. Vurğulanıb ki, 2023-cü ildə bu istiqamət üzrə Dövlət Xidmətində ümumilikdə 7597 müraciətə baxılıb, bu da 2022-ci illə müqayisədə 36,4% yüksək göstəricidir. Ötən il daxil olan müraciətlərin təmin olunma səviyyəsində 2022-ci illə müqayisədə 26,6% artıma nail olunub. Hesabat dövründə sahibkarlıq subyektləri tərəfindən istehlakçılara 618 min manatdan artıq vəsait qaytarılıb. Bu isə 2022-ci ildəki göstəricidən 83% çoxdur.
